Tweets by @KuldipPatel

Monday, April 04, 2011

Aya Naya Daur Hain

Bazar se mohalle ki sadak aaj bhi chithre haal hain.
Bandh naale mein bahe maila paani woh aaj bhi ek khayal hain.

Bai apane bachcho ko aaj bhi hain kaam pe bhejti
Aur neta ki biwi ki chachi ki ladki ki bhatiji bhi pahenti haar beshkeemti.

Aaj bhi pet bharne ke liye kheenchta insaan insaan ko hain
Aur kuch log kahete hain ki aaya naya daur hain.

Mumbai wale chacha aaj bhi office jate local train se latak ke.
Bole, achha hain main Bihar se nahi, warna maarte log patak ke.

Train ka aarakshan ka dibba hain aaj bhi saarvjanik
Aarakhsan kaam karta kahin aur is par guar farmaye tanik

Shadiyon ke liye aaj bhi hote swayamwar hain
Aur kuch log kahete hain ki aaya naya daur hain.

Gaon to chhodo shahro mein bhi hota hain power cut.
Aur gaon ki shala ke madhyahan bhojan hote hain safachat

Rahim ko hoti hain dikkat aaj ek flat lene ke liye
Aur ram ko hona padta hain badnaam ek mandir ke liye.

Pahele ki tarah aaj bhi Raja karodo mein khelte hain,
Aur kuch log kahete hain ki aaya naya daur hain.



Aaj kal padosi bhi dete hain shubkamnayein email par
Aur Bai maangane lagi hain chuuti apane mobile phone par

Aaj Common wealth se hote bade bade khel
Aur Sone ke bhaav bikey yeh mitti ka tel

Bazar mein bikane lagi yeh pyaz sev ke bhaav hain
Main bhi ab manane laga hoon ki aaya naya daur hain.

Ab to hone lage hain gotaale mein bhi aadarsh
To main bhi karne laga hu thoda sa vichar vimarsh

Superchor kiye jate hain reality show par nimantrit
Aur Doctor Binayak Sen kiye jaate hain ajeevan niyantrit

Chinta karne wali baat to ab yeh hain
ki main bhi ab maanane laga hoon ki aya naya daur hain.


-Yours Truly